© CDR O Viso | 14/12/2022 | Eólica así no!

A eternidade non ten présa (Concha Rousía)

Na defensa das montañas. Eólica Así Non. Temos alternativa.

"Na defensa das montañas. Eólica Así Non. Temos alternativa". Este foi o lema da concentración na que participamos o pasado día 11 en Xinzo de Limia; unha das 18 que se desenvolveron en Galicia. Acompañados de bastante xente, nunha mañá fría, fría, foi o sentimento de acollida, de sentirnos entre os nosos o que nos fixo vibrar emocionados. Caras amigas, saúdos afectuosos, pancartas, a lectura do manifesto, a de Concha Rousía e as cantigas de 2 na fronteira. Momentos para gardar na memoria e que reforzan o vínculo cos demais e co territorio.
Velaquí algunhas frases entrecollidas das moitas que soaron. E non vos perdades en documento adxunto o texto “A eternidade non ten présa” que alí nos leu a Concha Rousía. Moitas grazas a todas as persoas que no pasado e no presente acreditamos o que a Concha di que seguiremos a facer: Seremos ave Fénix, renaceremos tantas veces como necesario sexa… E ó final venceremos, porque nós, escoiten ben eses xudas que rouban para habitar no falso ceo do diñeiro, nós xamais, xamais, xamais nos renderemos.
“Os aeroxeradores próximos ós núcleos de poboación teñen un efecto adverso sobre a saúde.
A exposición ós sons de baixa frecuencia dos animais de granxa fai que podan ver alterados os seus ciclos reprodutivos e de aleitamento.
A construción dun parque eólico afecta ós ecosistemas alterando a fauna e a flora xunto cos microorganismos que habitualmente a acompañan.
O solo  que quede dentro do polígono do parque quedaría cualificado como de protección de infraestruturas, podendo utilizarse para instalacións de tipo industrial de xeito máis doado.
Hai un desequilibrio importante: Galicia produce máis enerxía eléctrica da que consume, 115Kw/Km2 fronte ós 46 que hai de media no estado. Os impactos quedan aquí e a enerxía e os beneficios van para fóra.
Afectación importantísima sobre o noso patrimonio. Afectación á paisaxe incuantificable, convertendo a nosa contorna nunha paisaxe industrial, inhabitable e inhóspita.
Estamos a favor das enerxías renovables, pero cunha transición xusta e ordenada. O sistema enerxético ten que ir acompañado de solucións para a redución do consumo, para o aforro, para a eficiencia”

Preme aquí para ler o texto de Concha Rousia: http://www.cdroviso.org/files/mscoviso/2022-12/14-21-48-4.admin.14-15-13-3.admin.A_ETERNIDADE_N_AtildeO_TEM_PRESSA1.pdf

Voltar