No CDR O Viso, levamos a cabo un dos programas máis desafiantes e emocionais que temos: un programa que vai de comportamentos fermosos, que nos achega ao máis profundo da vida das persoas maiores, dependentes ou con capacidades diferentes. Este é un traballo de acompañamento, de coidado e, en moitas ocasións, de despedida.
Dirixido principalmente a persoas maiores que teñen dificultades para desenvolverse de forma autónoma, este programa é unha ponte de apoio para quen carece dun soporte familiar ou social suficiente. A nosa misión é clara: permitir que estas persoas poidan continuar co seu plan de vida na súa vivenda, na súa contorna, sen sentirse totalmente sós. Fomentamos unha autonomía vencellada, asegurando que as súas necesidades básicas sexan cubertas, e ofrecendo un acompañamento emocional que lles permita permanecer no fogar en condicións óptimas e saudables.
O noso servizo abrangue acompañamento a servizos sanitarios, tramitacións administrativas e visitas hospitalarias a persoas que non teñen apoio familiar. Moitas veces, somos nós quen escoitamos o último adeus destas persoas, quen lles sostemos a man cando os seus seres queridos non poden estar presentes. Outras veces, acompañamos no regreso a casa, asegurándonos de que cada persoa teña o apoio necesario para continuar o seu camiño.
Tamén realizamos seguimento telefónico e visitas periódicas aos domicilios, tratando de previr que a soidade os leve a un deterioro psíquico. Neste acompañamento, buscamos estimular a mente e o corpo: con lecturas, paseos e actividades que lles fagan sentir vivos e conectados coa súa realidade e intereses.
Non é un traballo sinxelo. Ás veces, a dor é palpable. A falta de apoio familiar ou a ausencia total de seres queridos pesa moito, e nós, coma compañeiras e compañeiros, levamos esa carga con humildade e respecto. Porque este programa non é só sobre coidar; é sobre estar presentes, sen máis, sobre acompañar na vida e, nalgúns casos, na morte.
Con esforzo e corazón, tamén estamos traballando na creación dunha rede de apoio veciñal, para que ningunha destas persoas quede soa. Queremos que sintan que, aínda que non teñan familia cerca, temos unha comunidade que nos apoia e coida.
Este programa é a nosa forma de dicir que ningunha persoa merece afrontar as dificultades da vida en soidade. Acompañamos, coidamos, e tamén choramos con eles. Porque cada vida importa, e nós estamos aquí para lembralo.
O programa VOU CONTIGO finánciase a través da Consellería de Política Social e Igualdade da Xunta de Galicia a través da subvención destinada á realización de programas de interese xeral para fins de carácter social, con cargo á asignación tributaria do 0,7% do imposto sobre a renda das persoas físicas e o imposto de sociedades.