Xa nos vistes moitas veces na nosa horta en Lodoselo e coñecedes o noso banco de sementes. Pero o noso traballo vai moito máis aló dunha horta. A nosa compañeira Pili está a investigar nun programa científico-técnico de carácter medioambiental, baseado no traballo de sempre dos nosos maiores e no cotián para eles.
Obxectivo do Programa:
O noso obxectivo é investigar e poñer en valor a biodiversidade cultivada e o patrimonio natural, ademais de previr a contaminación no medio rural.
Onde? Comarca da Limia:
• Situada no sueste de Galicia, na provincia de Ourense.
• Historicamente unha comarca agrícola que sufriu grandes cambios nos últimos 60-70 anos, cunha notable redución da poboación e a adopción dun modelo de produción industrial.
Estes cambios levaron á desaparición de moitas variedades autóctonas, cultivadas e melloradas durante séculos polos agricultores locais.
A Nosa Investigación:
Enfocámonos na recuperación, recolección e almacenamento destas sementes autóctonas.
Obxectivos específicos:
• Recuperar variedades locais.
• Crear un banco de sementes con elas.
Actividades Realizadas:
1. Localización e Recuperación:
o Identificamos e recuperamos variedades autóctonas xunto con técnicas tradicionais de cultivo e modos de vida asociados.
2. Creación dunha Horta:
o Onde cultivamos estas variedades para fomentar a transmisión de coñecementos.
3. Educación Ambiental:
o Organizamos actividades destacando a importancia da biodiversidade e a súa con-servación, con participación de diversos colectivos.
Resultados:
Na etapa final da nosa investigación:
• Cultivamos nove variedades de hortalizas, renovando as súas sementes.
• Contamos con 13 variedades autóctonas no noso Banco de Sementes, dispoñibles xunto co-as súas fichas e o asesoramento necesario para o seu cultivo.
• Distribuímos sementes no noso centro, xornadas de sementes locais, intercambios e feiras agrícolas.
• Realizamos actividades educativas durante todo o ano, mellorando a accesibilidade ao no-so espazo con mesas de cultivo elevadas e ampliando a rede de camiños para que máis per-soas poidan participar no proxecto.
Importancia do Valor Local:
Despois de anos investigando o sistema agrario da Comarca da Limia e os saberes tradicionais, identificamos claves para a biodiversidade:
• Sementes: Transmitidas de xeración en xeración, son un patrimonio xenético inavaliable.
• Policultivo: Fundamental para satisfacer diversas necesidades humanas, animais e téxtiles.
• Abonado Natural: Procedente do esterco e coberturas vexetais, mantendo a fertilidade do solo.
• Labores Agrícolas Tradicionais: Realizadas manualmente ou con tracción animal, mini-mizando a invasión e preservando a vida na terra.
• Ecosistema Equilibrado: Sebes, regatos, paredes de pedra e arboredo que albergan fauna e favorecen os cultivos.
• Sistemas Autosuficientes: Sen xeración de residuos, en equilibrio coa natureza.
O sistema agrario tradicional é un crebacabezas no que todas as pezas son necesarias para o seu bo funcionamento, enfocadas en mellorar a fertilidade da terra e preservar a biodiversidade.
Non vos perdades o vídeo con máis detalles sobre este apaixonante proxecto!

https://www.youtube.com/watch?v=nsb3zGXz2zE&t=36s