Accesibilidad

Noticias 

© CDR O Viso | 18/04/2022 | Sábado de gloria 1

Sábado de Gloria... expectantes

Á procura de novas ruralidades

18/04/2022 | Lodoselo

O Sábado de Gloria, o Sábado Santo é un dos momentos máis importantes para todos os crentes católicos pois aínda que representa un día de loito, lembramos o paso de Xesucristo entre a morte e a resurrección. Trátase dun día de silencio, de espera, un día expectante.
Conmemórase a Soidade de María; lémbrase de maneira moi especial a dor, pero tamén a valentía e a fe; faise mención do descenso de Xesús ao abismo ou aos infernos, mencionado no Credo; en recordo disto, faise a bendición do lume e da auga pola noite.
Precisamente este sábado a media tarde démonos cita nas Casas da Memoria, en  Lodoselo  vintetantas persoas para ver as obras que se fixeron e como seguimos recuperando a nosa historia (co tema das minas de estaño e  wólfram, nomes dos lugares…) e plasmándoos nos paneis. Despois, tal e como tiñamos planeado fixemos unha camiñada por  Fontaos onde vimos o transformador que posibilitou a traída da luz na década dos 50 do pasado século e as ruínas do que foron as vivendas que seguen caéndose.
Subimos por As Lamas cara ao Monte de O Viso para ver algunhas bocas das minas, túneles, chemineas e tamén visitamos neste lugar a sepultura  antropomorfa, as enormes moles de pedra (Pena da Moura) e gozamos desta contorna compartindo unha tarde espectacular, lendas e algún que outro dato da natureza e histórico deste espazo no que se sitúan varios xacementos de diversa adscrición e tipoloxía.
Unha celebración máis dunha semana especial na que o pobo estivo cheo de xente, persoas que vivindo noutros lugares aproveitan estas datas para seguir mantendo o vínculo con este lugar e traballan por facer do seu pobo un espazo acolledor e entrañable. Unha gozada escoitar durante a marcha a algunhas nais contando aos seus fillos, sobriños, as súas historias cando de nenos viñan por aquí  pastoreando; un luxo que artistas como Rosalía e Julen dedicasen estas vacacións para pintar unha parte do vello palco das festas; unha escola viva ver a algunhas familias facendo o percorrido polo pobo cos códigos  qr ou a súa presenza aquí para ter un contacto co noso medio rural; un deleite contar cun veciño arcebispo para celebrar os oficios propios da Semana Santa. A  todxs moitas grazas e a seguir construíndo o “paraíso”, contribuíndo a xerar novas ruralidades.

Arquivada en:
Infórmate > Noticias