Noticias
© CDR O Viso | 03/12/2021 | Patio reitoral cheo de actividade
Biocoidados: o ecosistema de coidados para a vida que proporciona a comunidade de persoas que habitan un determinado lugar no medio rural
Proxecto con proposta provisional de concesión de subvención pola D. G. de Diversidade Familiar e Servizos Sociais #biocoidados
03/12/2021 | COCEDER
A proposta de resolución provisional no procedemento de subvencións convocadas ao amparo da Orde DSA/1199/2021, do 4 de novembro, pola que se establecen as bases reguladoras e convócanse subvencións para a realización de proxectos de innovación en materia de prevención da institucionalización, desinstitucionalización e desenvolvemento de servizos de apoio comunitarios no ámbito dos coidados de longa duración, vinculados co Plan de Recuperación, Transformación e Resiliencia, da D. G. de Diversidade Familiar e Servizos Sociais. (Secretaría de Estado de Dereitos Sociais, Ministerio de Dereitos Sociais e Axenda 2030), fai públicas as valoracións e propón provisionalmente a concesión de axudas a seis proxectos. Un deles é o noso, de COCEDER: BIOCUIDADOS: Novos modelos de coidado prestados pola comunidade, centrados na persoa, en contornas rurais.
Biocuidados está inspirado no ecosistema de coidados para a vida que proporciona a comunidade de persoas que habitan un determinado lugar no medio rural. Desde esta inspiración analizamos as necesidades e os propósitos de vida de cada unha das persoas. Despois establecemos un plan de acción que faga posible ao máximo o cumprimento do proxecto persoal. Para iso articulamos un conxunto de servizos de apoio ad hoc, utilizamos en gran medida os servizos e os recursos xa existentes na comunidade e complementaremos só aqueles que son imprescindibles e que non dispoñemos.
Dezanove entidades ( CDR) de Andalucía, Aragón, Asturias, Galicia, Castela e León, Cataluña e a Comunidade Valenciana, entre os que estamos o CDR O Viso e o CDR Portas Abertas asumiremos este novo reto cando a resolución sexa definitiva. Porque sabemos que a institucionalización supón, en moitos casos, un detrimento da calidade de vida, a privación de determinados dereitos e a grave limitación das relacións sociais.
Téñense aplicado modelos de atención pensados para o medio urbano, sen ter en conta a perspectiva micro e comunitaria, sen entender que desde un servizo no que participan persoas maiores ou con discapacidade, tamén poden ser atendidos outros colectivos, que o natural da vida é que participemos e convivamos con persoas diferentes e o antinatural e nada coherente é xerar disgregación e categorías e facer que sexan as persoas as que se adapten ás estruturas e non á inversa. Cústanos facer entender a necesidade de desenvolver proxectos de intervención integral que fomenten que os individuos poidan permanecer na súa contorna e participar activamente da vida social, aproveitando as prácticas, os saberes, os recursos creados para traballar en modelos alternativos e centrados na persoa.
Agora coa experiencia de máis de 25 anos e desde un coñecemento profundo do territorio e de todos os colectivos da poboación, desde a infancia a persoas maiores, crémonos con capacidade para traballar no desenvolvemento dun itinerario individualizado e integral con cada persoa e configurar o seu soporte vital, e deste xeito incrementar a súa calidade de vida e non só evitar o declive demográfico no medio rural senón atraer máis poboación.
A finalidade da proposta é, a partir dunha revisión do estado da cuestión neste ámbito, deseñar unha metodoloxía de cambio do modelo segmentario e baseado en estándares urbanos a un modelo de itinerario centrado na persoa no seu contexto, para o que que crearemos un equipo de profesionais cualificados para identificar e establecer un plan de vida da persoa, así como de activar e coordinar todos os servizos da comunidade.
Unha vez deseñada a metodoloxía, experimentarase en 18 comarcas do territorio español onde teñen as súas sedes as entidades socias de COCEDER, cos colectivos cos que traballamos como son: persoas con discapacidade, persoas maiores, adolescentes en risco de exclusión e persoas con enfermidade mental...
O período de implantación da metodoloxía baseada na persoa terá unha duración de 15 meses, tras a cal se realizará unha avaliación desta, realizada por persoas implicadas no proxecto, equipos de traballo implicados, axentes sociais da comunidade que interveñen desde a fase de deseño da metodoloxía, avaliadores externos e as administracións locais e autonómicas.
Realizada a avaliación, e cuns resultados cuantitativos e cualitativos como evidencia, elaboraranse unhas propostas que propoñan un cambio sistémico no modelo lexislativo e de financiamento que incidan na elaboración de novas políticas públicas que preveñan a institucionalización e fomenten a desinstitucionalización.
Arquivada en:
Infórmate > Noticias