© CDR O Viso | 15/10/2020 | Mujer rural

Celebramos o Día Internacional da Muller Rural

Seguimos o camiño cara a igualdade real.

Desde o CDR O VISO celebramos o día da MULLER RURAL que se conmemora cada 15 de outubro porque consideramos que é  imprescindible reivindicar a importancia do papel das mulleres na nosa comunidade.
Mulleres rurais son as nosas avoas labregas -sacho en man-, as mulleres do mandil, as bravas que levantaron un País emigrado, as que loitaron por acadar a cotitularidade nas explotacións agrogandeiras, e as que conquistaron os dereitos que nos corresponden como persoas; e si, elas son as que nos fixeron chegar ata aquí coa súa loita, a súa valentía e os seus coidados. Elas foron e son referencia.
Mulleres rurais somos tamén as que non marchamos, as que volvemos, as que emprendemos e xeramos riqueza, as que sostemos familia e aldeas, as que seguimos na loita pola dignidade comunitaria, memoria e conservación do patrimonio material e inmaterial.
Muller rural es ti que o sintes con orgullo ancestral
Somos mulleres rurais e reivindicamos uns servizos sociosanitarios dignos e que respondan ás necesidades do noso territorio.
Queremos unha conciliación real que garanta o benestar emocional familiar que non nos impida o acceso ó traballo.
Somos mulleres rurais contra o machismo e defendemos un modelo social humano e humanizado no que coidarnos -mulleres e homes- para poder coidar as persoas, a terra, a comunidade, criando ás nenas e nenos na igualdade e respecto á diferenza.
Somos mulleres rurais camiñando cara unha sociedade máis xusta na que  todas as persoas, independentemente do sexo, ideoloxía, orixe...teñan as mesmas oportunidades.

As mulleres rurais sementamos hoxe para un mañá máis libre.

http://cdroviso.blogspot.com/2020/10/15-de-outubro-dia-internacional-das.html

Voltar